En hae zag: Eme haaj twie zuuns. De jóngste van eur zag tiege zie vader:
vader, gaef mich 't deil van oes fortuun, det mich tówkeumtj. En hae
verdeildje-n-'t bezit ónger eur. En 'n paar daag later maakdje de jóngste zoen
d'r kleingeldj van en trok wied eweg en maakdje dao zien hiel hebbe en haoje op
in 'n laeve van oeverdaod. Wi-j hae d'r alles doergedrejdj haaj, kwoom d'r 'ne
zwaoren hóngersnoed in det land en hae begos ermooj te li-jje. En hae trok d'r
op oet en prizzentierdje zich aan ein van de börgers van det land en dae
steurdje häöm d'n akker op um zien verkes te heuje. En hae woej ziene boek völle
met schélle, di-j de verkes vroote, mer neeme goof ze häöm. Toen gong er
naodeenke en zag: Wi-jväöl daagloeners van mie vader hebbe broed zat en ich
krepier heej van 'e hónger. Ich pak mich op en gaon nao mie vader en zal 'm
zegke: vader, ich heb mich misdrage tiege d'n hiemel en tiegen uch. Ich bin neet
mier waerd um eure zoen te zeen, steltj mich mer geliek met ein van eur
daagloeners.
En hae stóng op en góng trök nao zien vader. En wi-j er nog wied eweg woor,
zoog zie vader häöm en krieg kompassie. En hae góng nao häöm haer, veel häöm
um 'e hals en kusjde häöm. En de zoen zag tiege häöm: Pap, ich heb mich
misdrage tiege d'n hiemel en tiege uch, ich bîn neet mier waerd eure zoen te
zeen. Mer de vader zag tiege zien knechs: Haaltj gauw 't beste kleid en dootj 't
hem aan en dootj'm 'ne rink aan zien vinger en schoon aan zien veut. En haaltj
't gemasje kaof en slachtj 't, en laote vae gaon fieste. want miene zoen heej
woor doed en es wier laevendj gewoere, hae woor verloere en es gevónge. En ze
begoste te fieste. Zienen aodste zoen woor op d'n akker en wi-j hae dócht beej
hoës kwoom huurdje hae muziek en danse. En hae reep ein van de knechs bi-j zich
en vroog waat t'r gaondje woor. Dae zag 'm: Eur broor is trökgekaome en eur
vader hiet 't gemasje kaof laote slachtte, umdet er häöm gezónd en waal trök
hiet. Mer hae woerd giftig en woej neet nao binne. Toen kwoom zie vader nao
boete en nuudje häöm oet um nao binne te kaome. Mer hae zag tiege zie vader:
Kiektj, ich bin al zoelang beej uch in deenst en heb altied nao uch geloesterdj,
mer mich hejje noets e geitebukske gegaeve um met mien kammeräöj te fieste.
Mer now dae zoen van uch gekaome is, dae alles van uch d'r doergedrejdj hiet met
slechte vrölluj, hejje veur häöm 't gemasje kaof laote slachte. Mer hae zag
tiege häöm: Jóng, gae zeetj altied bi-j mich en alles wat van mich is, is
ouch van uch. Vae móste fieste en plezeer make, want eur broor heej woor doed
en is laevendj gewoere, hae woor verloere en is wier gevónge.
