En hie zei: Un meens had twee jonges. De jongs'n van dee twee zei tegen z'n
vaor: Vao, geef mien ut part van wat we he'n, dat mie toekump. En hie verdeil'n
dat onder hullie. Een paor daag'n laoter maak'n de jongste jonge alles te gelde
en gung vort nur een veer laand, waor hie alles wat hie had dur deur broch deur
veuls te riekeluk te leef'n. Toe hie alles dur deur e'broch had, kwam der un
zwaore hongersnood over dat laand en hie begon gebrek te lieën. En hie truk tur
op uut en drung z'n eigen op an een burgerman van dat laand en dee jeug 'm nur
ut vuld um de vaarke's te heuj'n. En hie wou grig z'n buuk vull'n mit de
schellen, dee de vaarke's vratten, mer gien meens gaf z'um. Toen kwam hie tot
z'n eigen en zei: hoeveul dagloners van mien vao hen brood bie de bann'n en ik
kom um van de honger. Ik zal opstaon en nao m'n vao gaan, en 'k zal tegen 'm
zjeigen: vao, ik het ezondig teeg'n de hemel en tegen joe. ik bin nie me'r weerd
um joe jonge te wees'n; stel mie geliek mit één van joe dagloners.
En hie stung op en gung weer nur z'n vao. En toe hie nog lange niet der was, zag zun
vao hum a en kreeg medeliejen met um. En hie leup op um a 'n vuil um um de hals
en kust'n um. En de jonge zei teeg'n um: Vao, ik het ezondig teeg'n de hemel en
teeg'n joe, ik bin niet meir weird um joe jonge te wees'n.. Mer de vao zei
teeg'n z'n knech'n: Breng rap het goeie grei hier en trek um dat an en doe um
een ring an z'n haand en schoen'n an z'n voet'n. En haol et gemeste kallef en
slach ut, en laot'n we un feesmaol he'n. want mien junge hier was dood en is
weer levend ewurd'n hie was verleur'n en is evund'n. Z'n oudste jonge was op et
laand en toe hie dich bie huus kwam heurd'n hie muziek en daans'n. En hie reup
één van de knech's bie um en vreug, wat of ter te doe'n was. Dee zei teeg'n
um: joe breur is weer ekomm'n en joe vao heet het gemeste kallef laote slach'n,
umdat hie um gezond en wel weer heet. Mer hie wurn ondeugende en wou niet nur
binn'n gaon. Toe'n kwam z'n vao nur buut'n en drung bie um an. Mer hie zei
teeg'n z'n vao: Kiek, zoveule jaar'n bin'k a in joe diens en nooit he't 'k joe
gebod overtreej'n, mer mie he je nog nooit een geitebokjen egeef'n um mit mien
kameraaj'n fees te vier'n. Mer noe dee aandere jonge van joe ekomm'n is, dee joe
goed heet opemaak mit slechte wief'n he je veur hum het gemeste kallef laot'n
slach'n. Mer hie zei tegen um; Kiend, jie bin altied bie mien en al ut miene is
het joewe. Wule mos'n feesvier'n en schik hen, waant joe breur hier was dood en
hie is levend ewurd'n, hie was verleur'n en is evund'n.
