In Ie zei: D'r was d'er 'ns êêne mi twi zeunen. De joengsten daê van zei
tehen z'n vaôder: Vaôder, heef mien het dêêl van ons kappitaôl, wae ik
recht op ê. In ie dêêlde het bezit in twiën. In een paêr daêhen laêter
miek de joengste zeune aôlles op in hong op reize nâe een vaar land, waê ten
z'n kappitaôl der deur lapte, du 't held over de balke te hooien. Toe ten aôlles
op'emaekt aô, kwam d'r een aarge oengersnôôd over dat land, in ie behon
hebrek te lieën. In ie hong d'r op uut in droeng z'n eihe op bie één van de
burhers van dat land. In ie wou hraêg z'n maêhe vulle mi de schaalen, die de
vaarkes opfraête, ma ie kreeg ze van hin maans. Toe kwam 'n tot z'n eihe in ie
zei: Oevee knechs van m'n vaôder è brôôd zat, in ik staarve ier van d'n
oenger. Ik za oprieze in ik hae nae m'n vaôder, in ik zaahe teehen z'n: Ik è
m'n eihe misdroohe teehen den eemel in vo joe. ik bin nie mi waêrd om je zeune
te wezen; doe ma net zo mi mien, as mi d'êêste de beste knecht.
In ie kwam
overaande in ie hong nae z'n vaôder t'rug. In toe t'en nog een aande vort was,
aô z'n vaôder 'n in de haten. In ie kreeg 't te kwaêd 'termee. In ie liep naê
z'n toe, viel ten om z'n aôls in haf ten een kos. In de zeune zei tehen z'n: Vaôder,
ik è m'n eihe misdroke teken d'n eemel in vo joe, ik bin 't nie mi waêrd om je
zeune te wezen. Ma de vaôder zei tehen z'n slaôven: Lang subiet het hoeie
hoed, in doe dat bie z'n an in hee ten een rieng an z'n 'and in schoenen an z'n
voeten. In aêl 't hemeste kaôlf in slacht et, in dan ouwe ons een feêstmaêl.
Want m'n zeune ier was doôd, in ie is wi levend ôôre; ie was kwiet in ie is
t'rechte. In ze behonne te fêêsten. Z'n ouste zeune was op 't land in toe ten
dichte bie uus kwam, ôôrde 'nen meziek vo den dans. In ie riep één van de
knechs bie z'n in vroeg, wat ter op dêê. Die zei tehen z'n: Je broer is ekomme
in je vaôder eit 't hemeste kaôlf laete slachte, omdat ten 'n hezond in wel
t'rug eit. Ma(r) ie wier kwâed in wou nie nae binne. Toe kwam z'n vaôder nâe
buute in wou 'n bepraête. Ma(r) ie haf antwôôrd in zei tehen z'n vaôder:
Kiek, oevee jaêr bin ik à in je dienst in ik è nog nooit je hebod overtreeë,
ma j'ei mien nooit een heitebokje ehee om mi m'n kammerâos te fêêsten. Ma noe
die zeune van joe ekommen is, die je kappetâol d'r du elapt eit mi slechte
vrouwen, ei je vor 'um 't hemeste kaôlf laête slachte. Ma(r) ie zei tehen z'n:
Jôôn, jie bin aôltied bie m'n in aôl wat van mien is, is ok van joe. Ons
moste fêêste in blie weze, want je broer ier was dôôd in is levend ôôre,
ie was kwiet in is t'rechte.
