Hei wel ies eheurd van de hollebolle waogen, waor die hongerige Gijs op zat?
De rest van 't lieden za'k oe spaoren - want zo slim as Gijs het maokte, deed de scheurper 't niet, maor toch - jao - 't was toch de
meuite wel werd um te vertellen, hoe die het dee, - jao- 't was toch aanders as 'n gewoon mensk. -
Geen wonder was 't - o - nee, want 't scheupers lèven is zo aanders as aanders.
Van 9 ure 's morgens tot 8 ure 's aovunds is ie in de wèer - en van eten in de tussentied kump niet veule, zo a'j heuren zult.
't Is al veul vrögger luchtig, maor de schaop mutten niet te vrog uut de stal - um de mest - wee'j? Schaopmest is meraokel best op
't bouwlaand, en hoe langer ze in de schaopstal blieven - zoveul te dikker wordt de mest.
De schaopstallen gaon dan ook niet veur 10 uur lös, en veur die tied mut de scheuper èten. -
't Geet um de beurte by de boer - en zo kô'j um dan antreffen, nouw ies by de iene, dan weer by de aander - en zo truf ik hum 's
maondags morgens vaok an bij mien eerste klante tussen 8-9 uur.
Ze harren een keuterijgien en in die daogen ook 'n hok met 'n veerteg schaopen er in.
Um half negen was ik daor en dan kwamp ie binnen met 'n goeie morgen; zette 't schuppien teugen de waond, de knapzak hunk ie
um de stoel en de hond gunk an zien voeten liggen.
De vrouwe begunde de stoete in tien plakken te snieden en met smolt te bestrieken, Zo'n stoete duurde niet lange, maor
toegelieke gunk de pot met eerpels en boeskool boven 't vuur, en daarna kwaomp dan de breipot.
'n Scheuper die d'r 'n liefhebber van was, kreeg ook vaok pankoeken.
Under 't èten van de stoete kreeg de hond 'n paor korsties, toegelieke stund de koffiepot al klaor en veur 't gemak gunk alles in 'n
grote komme.
Meraokel zo as 't kerltien daor met worden kun, in de tied dat 'n gewoon mens ien plakkien opat, was 't hele zaokien al achter
de koezen.
Nouw volgde de moespot met spek en worst, en veur da'k 't wust, was d epot leeg, en keek ie al naor de breipot uut; toegelieke
likt de hond de pot wieder lege.
's Jonge, wat kun ie met de brij overweg - 't was 'n wonder - 't duurde alles bei mekaor maor 'n kwetiertien - en klaor was ie. -
Toen kreeg ie nog 'n stoete , 'n worst en 'n half pond spek mit in de knapzak veur de geeuwhonger, zoas ie zee, reup den hond
en was ie. -
'n Ogenblik laoter klunk de scheupershoorn, de potstallen gungen lös, en de schaop kwammen op weg. De haomels met de belle
veurop, en zo gunk um 10 ure de kudde 't veld in. Daor har ie dan op te passen dat zien doezend schaop niet 's manks de essen
kwammen, of in 't gruun leupen.
Toegelieke kwaomp de breikouse uut de knapzak, en zo har ie de hele dag te zorgen met zien hondien, dat alles naor de régel gunk.
In weer en wiend - régen of snei, 't gunk altied maor vört - nooit hadd' ie 'n heel dag rust.
Teugen - donker-aovund kwaomp de kudde weerumme, de haomels weer veurop, iedere troep vund zunder meuite ieder zien eigen
stal - en dan weur 't schaophok dicht daon.
De scheuper kreeg dan weer zien aovundporsie, die zowat gelieke war as 't morgenmaol! - Jao, zo'n schepers maoge was gezond
umdat hie aal daog in de boetenlöcht verkeerde; maor 't was toch effenties aanders as 'n gewoon mensk!
Bron: R. Houwink Hzn, Uut oes Drèènse Laand, Assen, 1930
