Limburgs

Streektaalfunctionaris Pierre Bakkes stelt zich voor in Dagblad De Limburger (luister naar een radio-interview met streektaalfunctionaris Pierre Bakkes: deel één - deel twee - deel drie)

"Tekste in 't Limburgs vertale is leefdjewerk"

Pierre Bakkes (59), streektaalfunctionaris veure provincie Limburg:

"Es streektaalfunctionaris höb ich de dagelikse zörg veur 't Limburgs. Waat det precies op zich haet? Beveurbeeldj ajers stimelere óm häör kinjer in 't Limburgs op te trčkke. Of jóng luuj d'r van te euvertuge det 't Limburgs net zoea good 'n geaccepteerdje taal is es 't Nederlands. 'n Taal waert in laeve gehaje door häör te lieére ane nuuj generatie. Daoróm zeen kinjer en jóng miense zoea veurnaam in det proces.
Ich höb plezeer ane versjille in 't Limburgs. Es ich mit emes kal, moog daen angere mich neet zčgke wo d'r vandan kump. 't Is spannendj óm det zelf te óntdčkke. In Midde-Limburg kan ich meistal waal precies zčgke wo emes vanaaf kump. Inne anger stökker van Limburg moog ich van michzelf neet mieër es vief kilomaeter d'nr naeve sjatte. 't Vasstčlle van e dialek van emes is gein magie. Taalliene, isoglosse wie Weijnen zaet, gaeve dich aan wo bepaoldje menere van oetspraeke en versjillendje wäörd veurkómme.
Officieel bön ich nag neet in functie. Op 24 januari haet de provincie waal 't besloet genómme det dao geldj vrie kwaam veur 'ne streektaalfunctionaris. Op 1 mieërt zal ich in deens kómme vanne provincie. 't Budget det zie opzie gezatj höbbe is óngevier 795.000 gölje, veur 'n periode van drie jaor. Per jaor is det zoeaget 265.000 gölje. Dao zitj alles in: 't werkgaeversdeil, mie salaris, kentoearruumdje, telefoon, computer, breefpepier, en zoea wiejer.
Wie ich huuerdje det de provincie emes zóch, höb ich bie michzelf gezag: Dao geit Pjaerke op sollicitere!' Ich bön namelik ane universiteit gepromoveerdj op e dialeköngerwerp. 't Óngerzeuk ging euver versjil in dialek in Mofert euver 'n periode van drie generaties: van opa op zoon op kleinzoon en van oma op dochter op kleindochter. Dao bön ich zelf opgegreudj. Mie moder waas hiel strang in häör taalopveujing: veer móchte heim allein meh Moferts kalle. Mie vader waas oet Postert: dae haet 't neet gemekkelik gatj daomit.
Op 't moment bön ich lieëraar-Nederlands ane Fontys-Hoeagesjoeal in Zittert, oppe aafdeiling lieërare-opleiďng'. Ich gaef veural lesse taalkunde aan oos studente. Daobie gaef ich häör ouch les inne didaktiek van Nederlands es twiedje taal: euver wie se angestalige miense 't Nederlands mós biebringe. Mie salaris is zoeaget 120.000 gölje bruto per jaor (sjaol 12.6!). Ich waer door Fontys oetgelieëndj ane provincie. Dao höb ich speciaal óm gevraog óm 'ne pensioenbreuk te veurkómme.
Wčrke aan en in 't Limburgs is veur mich ein-en-al plezeer. Ich bön noe al dökker half daag kwiet aan 't laeze en beantjwaorde van breve, vertale van tekste, corrigere van tekste van angere. Zoea hieël aaf en toe wiltj me dao waal 'ns 'n cadeaubón veur gaeve. Mer 't meiste van det werk is leefdjewerk. Ich doon det ech hieël erg gaer.'

zaterdag, 03 maart 2001
© Dagblad De Limburger





 
Google
 
Web Deze website