Op 14 fibberwarie 1997 woor 't Limburgs offesjeel door de Hollese regering
es taal erkant.
Vanoet de Pertie Nuuj Limburg (PNL) kaom veurige zoemer eine
innesjetiefveursjlaag, óm 't gebroek van de Limburgse taal wiejer te
sjtiepe en óm ei 'Algemein Gesjreve Limburgs' (AGL) te óntwikkele. Deze
veursjlaag woor in de gedippeteerde sjtaote behanjeld. Nao 't evórtlaote
van 't AGL, woeveur 't nog gein voldoonde pollitike sjtiep goof, woor de
veursjlaag aangenómme. Dit meint det ein 'streektaalfunctionaris' door de
provins is aangesjtčlt dae zich es 'wiesman' actief mit 't Limburgs geit
besjeftige. Ouch weurt eine Raod veur 't Limburgs opgezat. De
streektaalfunctionaris weurt Pierre Bakkes oet Mofert. In
de gezčt (Dagblad de Limburger) sjtčlde er zich alvas veur.
't Limburgs is ein echte taal
't Limburgs is ein zelfsjtendige en volsjtendige taal, en haet nauw
lingwistisse benj mit Pruses en Holles. 't Haet eine angere oersjprunk es
't Holles en 't besjtrik ei semmelik groet gebeed. Ómmetóm ein miljoon
luuj kalle aldaag Limburgs, en 't taalgebeed sjtrčk zich oet bis euver de
päöl nao 't Belsj en 't Pruses.
Väöl luuj gaeve de Limburgse taal aan es 'de Limburgse dialekte'. Dit
sjtömp neet, den eine dialek is sjlechs eine varrejant van ein
zelfsjtendige taal. 't Limburgs, aevel, is erkant ónger 't Europees
Verdraag van Lokaal- en Minderheidstale. 't Doel van dit verdraag is 't
besjirme en sjtiepe van klein tale in de Europa. Belangriek aevewaal, veur
't aafpäöle van 't begrip 'dialek' zeen de criteria die 't 'European
Bureau for Lesser used Languages' hieveur gebroek: "Dialekte richte
zich aanbelang de gebroekde wäörd, zatsboew en rechsjrieving nao ein
sjtanderdtaal." Gein van dees drie guld veur 't Limburgs. Veer kinne
dus waal kóngkledere det 't Limburgs ein volsjtendige taal is, dae zich
zelfsjtendig haet óntwikkeld.
De versjille die 't tösje de dialekte in Limburg óngerlings geuf, kómme
in jeder taal veur. Emes oet Remunj kalt angers es emes oet Mestreech,
zjus wie eine Hollenjer angers kalt es eine Braobenjer.
