En hae zag: Emes hauw twie zeune. De jongste van hun zag taege z'ne vajer:
Vajer, gaef mich m'n kènjsdeil, det mich toekump. En hae verdeilde de
bezittinge onger hun. En winnige daag later maakde de jongste zoon al te gelde
en gong op reis nao e wied land woe hae z'n vermaoge dedoordriejde in e laeve
van euverdaod. Doe hae al dedoorgedriejd hauw, kaom d'r einne zjwoere
hongersnoed euver det land en hae begós ermooj te lieje. En hae trók d'robboet
en dróng zich op aan eine van die luuj van det land en dae sjikden 'm nao 't
veld óm zien verkes te heuje. En hae wól gaere z'ne boek völle mit de sjèlle
die de verkes ote, meh nemes gaof z'm. Doe kaom hae tót zichzelf en zag: Wieväöl
daagloenders van miene vajer höbbe broed in euvervlood en ich kaom hie óm van
d'n hónger. Ich zal opsjtaon en nao m'ne vajer gaon en taegen 'm zègke: vajer,
ich höb zunj gedaon taege d'n hiemel en veur uch. ich bin neet waerd eure zoon
te haete: sjtèl mich geliek mit eine van eure daagloenders.
En hae sjtong op en gong nao z'ne vajer trök. En es hae nog wied aaf waar, zoog z'n vajer 'm en
hauw kóompassie mit 'm. En hae leep nao 'm toe, vool 'm óm d'n hals en puunden
'm. En de zoon zag taege 'm: Vajer, ich höb zunj gedaon taege d'n hiemel en
veur uch, ich bin neet mie waerd eure zoon te haete. Meh de vajer zag taege z'n
sjlaove: Bring gauw 't bèste kleid hie nao toe en trik 't 'm aan en doog 'm
eine rink aan z'n hand en sjoon aan z'n veuj. En haolt 't gemèjste kauf en
sjlach 't, en laote v'r eine denee gaeve. Want m'ne zoon hie waar doed en is
weer laevend gewaere, hae waar verlaore en is gevónje. En ze begónne faet te
vere. Z'ne audste zoon waar op 't land en wie hae bekans heivers waar huurde hae
meziek en dans. En hae reep eine van de knèchte bie zich en vroog 'm, waat is
hie te doon. Deze zag 'm: eure broor is gekómme en eure vajer haet 't gemèsjte
kauf laote sjlachte, ómtót hae h'm gezónd en waal trök haet. Meh hae woor
kaod en wól neet nao bènne gaon. Doe kaom z'ne vaajer nao boete en bleef
aandauwe bie 'm. Meh hae gaaf es antwaord trök taege z'ne vajer: Loer, zoeväöl
jaore bin ich al in euren deens en noets höb ich eurgeboeje euvertraoje, meh
mich höbt geer noets e geitebukske gegaeve óm mit mien vrunj faet te vere.
Meh, noe dae zoon van uch gekómme is, dae eur bezittinge dedoor haet gedriejd
mit sjlèchte vrouwluuj, höb geer veur häöm 't gemèsjte kauf laote sjlachte.
Meh, hae zag taegen 'm: Kènd, de bis altied bie mich en al waat van mich is is
van dich. Veer moste faet vere en sjpas make, want eure broor hie waar doed en
is laevend gewaere, hae waar verlaore en is gevónje.
